29.03.2024

Preußische Allgemeine Zeitung Zeitung für Deutschland · Das Ostpreußenblatt · Pommersche Zeitung

Suchen und finden
11.08.01 Beetebartsch on Co.!

© Das Ostpreußenblatt / Landsmannschaft Ostpreußen e.V. / 11. August 2001


Beetebartsch on Co.!
von Erika Hanff

Wenn eck hied em Öller von 66 Joahr en mien Kastrollke on de Flinsepann kick, find eck allet wat ons lew Gottke heft wasse lote. Egol ob en hiesiger Eerd oder op Boem en fremde Länder, von dene eck als Kind noch nich mol en Nome kennd. Dat Scheenste es, et schmeckt mie ok allet! Ob gekokt, scheen reesch gebrode oder roh to Salot. Querbeet, so wie et kemmt. Dat wer ower nich emmer so. Als kleenet Gnabbel, tuhos en Ostpreiße, wer eck, wie man domols bie ons seed, trochschnutzig! Mien Omke, bie der eck opgewasse ben, had so ähr Sorje met miener Eeterie.

Jo, wenn et jede Dag Kartoffelflinse, Brootkartoffle, Schmorkomst oder Kielke jew, wer ähr Puttke, wie se mie nennd, tofrede. Ok gejen Klunkermos met Melk oder Kerfs, gestowde Meehre on freschet, selfstgebacknet Brotke met Schmolt had eck nuscht to kujonere. Scheene jeele Kartoffelkes met Prachersoß on Sperkel weere ok nich to verachte.

Wenn Opke dem Truschbock et Fell ewer de Ohre toch, wer eck meist e betke trurich. Ower wenn he gebrode opem Desch stund, had eck schon verjete, dat eck eene Dag verher noch bie ehm em Stall hugd on siene schwatte Pelz puscheid. Ower noch lang nich allet, wat Stall on Garde to bede had, fund mien Tostemmung. Vleicht leg et ok e betke an Omakes Kokkunst. Se schmurjeld on kokd, so wie et ähr am beste schmeckd. Nich emmer wer dat no de Näs von ons andere.

Schon mien Voder wußd to vertelle, dat he als kleener Boschel schon en ährer Griessopp "nuscht finde kunn", wat heete sull, se wer em to denn! De Feststellung brochd so manche Mutzkopp en. So wie de Griessopp weere ok alle andre – pladdrich! Dat sull nu nich heete, dat de Großke e schlechte Koeksche wer, amend hat se mie e beske to veel verwännt. Oder de Gnabbels send em allgemeine em bestemmte Öller e bet kiesätig. Manchmol had dat Opsternotsche gar nuscht met de Kokerie to done. Da regd all e Ploster op heeter Melk, öm seck benoh dran to terwerje. Met Keenigsberger Fleck on Schwatsuer kunn man mie joge, de seje mie to ontiedich ut. Kodderkomst hatd toveel Strunke, em Heringsgruschel versteckde seck manch spreckriege Gräte.

So kunn eck noch manche Gerechte optelle, de nich en miene Schlunk wulle. Mien allerschlemmster Dag wer, wenn Oma mie morjens vertelld: "Hiede jeft et to Meddag Beetebartsch!" Mien Jesecht on de Wej von de School wurde emmer länger. Ower et nutzd nuscht, de Sopp rennd nich wej. Da hugd eck nu am Desch, de Schmand on de rengebrodene Sperkel ut dem rotlachtig geföllde Teller lachde mie an. Bloß mien Arm wurd emmer schwarer on kunn dem Läpel nich terhewe. Omke glubschd mie ewer de Brell an on sed: "Wat anderet jeft et nich, wenn du dat nich wellst, moßt hungre!"

Mien Mooje gnorrd bett Vesper. Da krech eck statt seetet Brotke de opjewarmd Beete verjesett. Erscht oawends erbarmd seck ons "Keche-Chef".

Wat heft de Großke nich allet versocht, mie dat Gerecht schmackhaft to mooke. Enmal versprok se mie e ganze Tafel Schoklod! Nuscht to mooke! Eck jield woll e Wiel no solk seete Utsechte, over ok de kreje mien Tähne nich utnander. Dem Großvoader ded eck emmer leed. He sed denn meistens: "No loot de Marjell doch, wenn se nich well!" Doch dat Oberhaupt leet seck von ährer "Erziehung" nich affbringe.

Hiede kann eck nich verstohne, to wat eck dem Beetebartsch nich ete wull, weet nich emol wat dadran so grurig geschmeckt hebbe sull. Omke kunn mie dat vleicht segge – ower de kann eck nich mehr froge!